حکومت آخری نبیﷺ کےصدقےہمیں عطا کی گئی،دشمن جومرضی کرلے،پرویزالہیٰ

وزیراعلیٰ پنجاب چوہدری پرویز الہٰی نے کہا ہے کہ حکومت آخری نبی ﷺ کے صدقے ہمیں عطا کی گئی، اللہ ہی اس کی حفاظت کرے گا، مسلمان ہیں دل و جان سے آخری نبی ﷺ پر بھروسہ کرتے ہیں، دشمن جو مرضی کرلے حکومت قائم رہے گی۔پنجاب اسمبلی کا اجلاس 2 گھنٹے 12منٹ کی تاخیر سے شروع ہو گیا، جس کی صدارت اسپیکر سبطین خان کر رہے ہیں۔اجلاس کے وقت حکومت کے 149 اور اپوزیشن کے 115ممبران موجود ہیں۔ پنجاب اسمبلی کے ایوان میں دی پنجاب ہولی قرآن پرنٹنگ اینڈ ریکارڈنگ ترمیمی بل 2022 پیش کیا گیا، جسے حکومتی رکن میاں شفیع نے پیش کیا، اس دوران اپوزیشن کی جانب سے نعرے بازی جاری رہی۔‎پنجاب اسمبلی میں دی پنجاب ہولی قرآن پرنٹنگ اینڈ ریکارڈنگ ترمیمی بل متفقہ طور پر منظور کر لیا گیا۔خاتم النبین یونیورسٹی لاہور بل 2022 حکومتی رکن میاں شفیع نے ایوان میں پیش کر دیا، پنجاب اسمبلی میں حکومت نے خاتم النبین یونیورسٹی لاہور بل 2022 متفقہ طور پر منظور کر لیا۔وزیر اعلیٰ پنجاب پرویز الہٰی نے ایوان سے خطاب کرتے ہوئے کہا کہ خاتم النبین بل اور قرآن پرنٹنگ اینڈ ریکارڈنگ بل منظور کرنے پر سب کو مبارکباد دیتا ہوں۔ان کا کہنا تھا کہ دین کی حفاظت کے بل کی منظوری پر اچھا پیغام جاتا ہے، پرائمری اسکول سے بارہویں کلاس تک قرآن کریم کی تعلیم کو لازمی قرار دیا گیا۔چوہدری پرویز الہٰی نے کہا کہ حکومت و نجی اسکولوں میں قرآن کی تعلیم دی گئی، جو اچھا اقدام ہے، ہماری اور عمران خان کی حکومت جو دین کی سربلندی ختم نبوت پر جو قانون سازی ہوئی اس پر سعادت عمران خان و پاکستان تحریک انصاف (پی ٹی آئی) کو دی ۔ ان کا کہنا تھا کہ حکومت آخری نبی ﷺ کے صدقے ہمیں عطا کی، اللہ ہی اس کی حفاظت کرے گا، مسلمان ہیں دل و جان پر آخری نبی ﷺ پر بھروسہ کرتے ہیں، دشمن جو مرضی کرلے حکومت قائم رہے گی۔پرویز الہٰی کا کہنا تھا کہ ہم کسی سے نہیں مانگتے اللہ و رسول سے مانگتے ہیں، کتنی مشکلات سے گزر کر ایوان میں بیٹھے ہیں۔وزیراعلیٰ پنجاب نے کہا کہ اس کام کو جاری و ساری رکھیں گے، یقین سے کہتا نسلیں دین کی خدمت جاری رکھیں گی، اللہ کا شکر ادا کرتا ہوں، مجھے میری کابینہ کو سعادت بخشی۔دوسری جانب، اسپیکر سبطین خان نے اسمبلی سے خطاب کرتے ہوئے کہا کہ 2 بل جو پاس ہوئے، اس پر حکومت و اپوزیشن کا اچھا کردار ہے، وزیراعلی پنجاب لائق تحسین ہیں، جو ممبر بھی اس بل میں شامل رہے، اللہ ان کو بھی اجر دے۔ پنجاب اسمبلی میں شور شرابے کے دوران گجرات یونیورسٹی ترمیمی بل 2022 بھی منظور کر لیا گیا، جسے میاں شفیع نے ایوان میں پیش کیا تھا۔اسی طرح حکومت نے پبلک سیکٹر یونیورسٹی ترمیمی بل 2022 بھی منظور کر لیا جبکہ لاہور یونیورسٹی آف بائی لوجیکل اینڈ الائیڈ سائنسز بل 2022 کمیٹی کے سپرد کر دیا گیا۔ پاکستان مسلم لیگ (ن) کے رکن اسمبلی رانا مشہود احمد خان نے ایوان سے خطاب کرتے ہوئے کہا کہ جو ایوان کی کارروائی ہو رہی ہے، وہ غیر قانونی ہے۔ان کا کہنا تھا کہ جو گفتگو سابق وزیراعلیٰ نے کی، اگر ریاست مدینہ ہے تو عمران خان ٹیریان کو مانیں، مجھے کوئی فرق نہیں پڑتا کہ ریاست مدینہ ہے، ریحام خان کی کتاب کا جواب دیں، اگر ریاست مدینہ ہے تو طیبہ گل کا جواب دو۔ رانا مشہود نے کہا کہ آئین و قانون کے تقدس کو پامال نہیں ہونے دیں گے، آئین و قانون کے مطابق ہاؤس کو چلائیں وگرنہ چلنے نہیں دیں گے۔اس دوران پنجاب اسمبلی مچھلی منڈی بن گئی، اپوزیشن اور حکومتی آمنے سامنے، اراکین کی جانب سے شدید شور شرابا جاری رہا اور اپوزیشن اراکین حکومتی بنچوں کے سامنے آگئے۔پنجاب اسمبلی میں دونوں جانب سے شدید نعرے بازی کی گئی، حکومتی اراکین کے گلی گلی میں شور ہے، سارا ٹبر چور ہے، اور امپورٹڈ حکومت نامنظور کے نعرے لگائے۔اپوزیشن اراکین کی جانب سے گھڑی چور کے نعرے لگائے گئے۔ اسپیکر سبطین خان نے کہا کہ اپوزیشن اپنی جگہ پر بیٹھیں، رانا مشہود کو بولنے کا موقع دینا چاہتا ہوں، سلمان رفیق صاحب اپوزیشن اراکین کو بٹھائیں، عمر فاروق اور عرفان اللہ اپنی سیٹوں پر بیٹھیں۔ پاکستان تحریک انصاف کے رکن اسمبلی رانا شہباز نے ایوان سے خطاب کرتے ہوئے کہا کہ گورنر پنجاب (بلیغ الرحمٰن) نے گندا کام کیا اور پنجاب اسمبلی پر شب خون مارا، اسے سزا دی جائے۔ ان کا کہنا تھا کہ رات کو ان کے چہرے دیکھنے والے تھے، گورنر کی ڈگری جعلی ہے، ڈگری چیک کروا لیں، گورنر کو پنجاب میں رہنے کا حق نہیں ہے۔رانا شہباز نے کہا کہ رانا ثنا اللہ ڈرپوک ہے، وہ بھاگ گیا ہے، وزیر اعظم شہبازشریف تین، تین ٹوپیاں تبدیل کررہے ہیں، آصف زرداری کو بلا کر منڈی لگا لی ہے، حرام کی کمائی پر لعنت ہے، خود چور ہے ان کا ریکارڈ دیکھ لیں۔ ایوان میں گورنر پنجاب کے خلاف قرارداد سے پہلے اپوزیشن ایوان سے واک آؤٹ کر گئی۔ سینئر صوبائی وزیر پنجاب میاں اسلم اقبال نے ایوان میں گورنر پنجاب بلیغ الرحمٰن کے خلاف مبینہ غیر آئینی اقدامات پر قرارداد پیش کر دی۔ حکومت نے گورنر پنجاب بلیغ الرحمٰن کے خلاف قرارداد منظور کر لی۔گورنر پنجاب کے خلاف پیش کی گئی قرارداد کے متن میں کہا گیا کہ پنجاب اسمبلی کا ایوان قواعد و ضوابط کےٗتحت منظور کرتا ہے کہ دستور کے تحت اقتدار اعلیٰ خدائے بزرگ برتر اور اختیارات عوام کے پاس ہیں۔ متن میں مزید بتایا گیا کہ امپورٹڈ حکومت کی جانب سے پنجاب پر یلغار جاری ہے، پنجاب اس یلغار کا نشانہ بن رہاہے، اکثریتی حکومت کو غیر مستحکم کرنے کی کوشش کی جا رہی ہے، جس کی مذمت کرتے ہیں۔ قرارداد کے متن میں مزید بتایا گیا کہ ضمیر فروشی سے حکومت کو غیر مستحکم کرکے ایوان کے خلاف غیر جمہوری یلغار کا سلسلہ جاری ہے، گورنر نے 22 دسمبر کو وزیراعلیٰ پنجاب اور کابینہ کے خلاف اختیارات سے تجاوز کیا اور ایوان کا استحقاق مجروع کیا۔ اس کے علاوہ یہ بھی کہا گیا کہ صدر مملکت سے اس شرمناک اقدام کا نوٹس لینے کی گزارش ہے، فوری طور پر گورنر کو منصب سے معزول کرنے کااہتمام کریں۔ چوہدری پرویز الہیٰ پر ایوان اعتماد کااظہار کرتا ہے، اور اسپیکر کی رولنگ کی توثیق کرتا ہے۔