انڈونیشیا: فٹبال میچ کےدوران ہنگامہ آرائی،174 افرادہلاک 180 زخمی

انڈونیشیا میں فٹبال میچ کے دوران ہنگامہ آرائی اور بھگدڑ مچنے سے ہلاک ہونے والوں کی تعداد 174 تک جا پہنچی جبکہ سیکڑوں افراد زخمی ہوئے۔ہفتے کی شام انڈونیشیا میں فٹبال کا میچ جاری تھا، میچ مقامی ٹیموں اریما ایف سی اور پرسی بایا سرابیا کے درمیان کھیلا جارہا تھا کہ پرسی بایا کی جیت پر ان کے حمایتیوں اور مخالفین کے درمیان ہنگامہ آرائی شروع ہو گئی۔ہوم گراؤنڈ پر میچ ہارنے پر اریما ایف سی کے سینکڑوں مداح طیش میں آگئے اور اسٹیڈیم اور گراؤنڈ میں داخل ہوگئے، مشتعل مداحوں کو منتشتر کرنے کے لیے پولیس نے آنسو گیس کا استعمال کیا اور لاٹھی چارج بھی کیا۔غیر ملکی میڈیا کے مطابق اسٹیڈیم میں پولیس اور شائقین کے درمیان ہنگامہ آرائی کے نتیجے میں 174 افراد ہلاک ہوگئے جبکہ زخمی ہونے والے 180 افراد میں سے 11 افراد کی حالت تشویشناک ہے۔